最近我沉迷英式桌球，即係Snooker，所以我對桌球係咪運動呢件事有唔少思考。不久前先結束亞運，電競作為其中一個項目，電競日後登上奧運舞台我唔會覺得意外，不過作為比電競更加似「運動」嘅桌球嚟講，我預料會比電競更遲成為奧運項目。
個人認為桌球同電競都係運動，不過好明顯大家涉及嘅運動元素唔同，隨著時代嘅進步同發展方向，運動再唔係單單形容身體，而包含腦部運動，例如棋牌。
雖然現今嘅運動定義會令到好多項目會變成運動，不過運動呢個標籤真係咁重要？以圍棋作為例子，佢嘅起源大約係公元前23世紀，擁有咁深厚嘅歷史背景同文化，有需要俾運動定義？我認為咁樣反而令到圍棋降格，冇咗圍棋本身嘅文化定位；但係作為圍棋推廣，入亞運會係有佢嘅意義存在。
到底桌球應唔應該爭取作為奧運項目同電競係面臨同一個問題，今次我哋唔將推廣作為理由去討論，單純以運動標籤去定義桌球同電競，我認為唔需要，無論以可行性同運動本身嚟講。
先講英式桌球（Snooker），起源於19世紀晚期，盛行喺大英國協地區，所以大家會見到日本、台灣都係打美式桌球比較多，英式桌球相當唔流行，不過早於2016年「世界桌球協會」宣佈將爭取英式桌球成為2024奧運運動項目，不過我認為英式桌球只可以叫做區域性運動，因此桌球入奧我認為唔係明智嘅決定；同埋桌球仲有分唔同種類，有英式桌球、美式桌球、英式16波、中式桌球等，難道要將所有種類入奧？
電競都有一樣嘅問題，大家淨係留意LOL唔同賽區選手嘅國籍就會明白，例如LEC賽區（歐洲），你搵一隊全部同國籍嘅選手係超級難，比LCS賽區（北美）更加難，不過我認為呢個問題唔難解決，同足球嘅世界盃一樣，都有實力參差不齊嘅情況，困難點在於國籍相同同整體實力嘅平衡；同埋選擇遊戲都係電競入奧嘅糾結點，因為遊戲太多，同埋涉及公司，難以平衡各方利益。
入奧嘅問題並唔大，因為亞運已經為全球示範咗，係有一定嘅可能性，不過回歸返今日嘅主題運動標籤嚟講，難道有意義？作為一項已經獨立運行而且成熟嘅「運動」，根本就唔需要依賴奧運，自己已經可以輸出文化，冇必要去配合運動會嘅規範，例如避免暴力同血腥嘅詞語同畫面，因此出現咗官方直播主播嘅詞語轉換笑料，同埋其他遊戲都有一定程度嘅玩法同評述改變。
事情冇我哋諗得咁簡單，入唔入奧又唔係我哋需要考慮，只要我哋繼續熱愛同支持電競，佢就依然會存在。
