【賽事回顧】PCS週報：FRANK Esports 季後賽 Round 3戰報
雖然上個禮拜FRANK Esports（FAK）跌咗落去敗者組，但係佢哋嘅故事仲未完結，仍然有機會攞冠軍。究竟最後結局係Good End定Bad End呢？我哋一齊睇下啦。
VS Impunity（IMP）
Game 1 Holo選手罕見選用奈德麗。FAK下路雙人組，無論對線定前期團戰都發揮出色，16分鐘全隊經濟領先5K。雖然20分鐘佢哋輸咗波團戰，令IMP追平經濟，但係34分鐘Solokill選手伊瑞莉雅單切後排嘅精彩操作，令佢哋有驚無險咁贏下第一局。
Game 2 FAK下路雙人組再一次線殺，帶領全隊滾雪球。呢局FAK 5個都發揮出色，Pretender選手古拉格斯亦單殺Mission選手杰西。FAK以18:1擊殺數壓倒性優勢攞下賽點。
Game 3 前期兩隊碰撞比較多，打得有來有往。直到24分鐘小龍團戰，勝利女神開始向FAK揮手。30分鐘FAK單捉Mission選手，之後以多打少團滅IMP，攞下巴龍。IMP完全阻止唔到FAK嘅推進，FAK 3:0完勝IMP！
VS CTBC Flying Oyster（CFO）
Game 1 CFO野輔遊走打出成效，經濟略略領先FAK。17分鐘小龍團戰一開始FAK處理得比較好，後來JimieN選手卡桑帝殺3個，呢波團戰CFO贏返轉頭。之後CFO入侵野區，利用視野優勢不斷單捉FAK成員，攞下巴龍。23分鐘FAK中野單捉Rest選手杰西，點知Shunn選手吉茵珂絲超威能死亡火箭遠程狙擊，反而係FAK中野死咗。與此同時CFO中下2打3團滅FAK，CFO贏下第一局。
Game 2 前中期兩隊平穩營運，分唔出高下。直到28分鐘巴龍團戰FAK以1換4贏下團戰，攞下巴龍，FAK經濟起飛。CFO陣容冇坦，FAK後期捉住呢個弱點，輕鬆打贏團戰，FAK扳回一局。
Game 3 兩隊都係後期發育陣，不過CFO前期團戰小勝FAK。17分鐘Solokill選手吶兒1推4，帶領隊友2換5贏下小龍團戰。23分鐘MnM選手婕莉配合Pretender選手安妮切後排，再加上吶兒1推3，FAK輕鬆贏下巴龍團戰。31分鐘Holo選手悟空後兜配合安妮完美Combo 0換4攞下賽點。
Game 4 前期Holo選手悟空遊走駐爆中路，中後期團戰都發揮出色，次次都轉到對面傻下傻下。FAK以18:2擊殺數壓倒性優勢贏下呢個BO5，晉級冠軍賽！
VS PSG Talon（PSG）
Game 1 前期PSG針對Solokill選手關，唔俾佢發育。佢哋控圖非常出色，攞曬所有地圖資源。18分鐘小龍團戰，雖然FAK切到後排，但係佢哋打唔死PSG坦克。PSG 1換4，攞下聽牌龍，領先經濟6K。去到最後PSG上野都冇死過，PSG以19:3擊殺數壓倒性優勢贏下首局。
Game 2 PSG選用最近LPL賽區Bilibili Gaming戰隊鐘意用嘅陣容鏡爪加里歐，Ban / Pick比FAK好。前期為咗防塔殺Solokill選手TP咗落下路，搞到自己冇咗好多兵，7分鐘已經輸咗一倍兵數。FAK比較被動，上野嘅兵差隨住時間越拉越開。同上場一樣，PSG攞曬所有地圖資源。18分鐘Azhi選手凱能後兜電4個，PSG 1換4攞下聽牌龍。之後PSG攞住巴龍同水龍魂推進，鏡爪大都未開過就完場，攞下賽點。
Game 3 FAK選用路娜組合，PSG選用婕露組合。JunJia選手控圖繼續控好控滿。16分半小龍團戰FAK先捉死婕莉，不過JunJia選手偷龍成功，仲4打5打贏團戰。後續PSG基本上打團冇人再死，婕莉亦裝備成型，冇人能擋。PSG 3:0完勝FAK。
恭喜PSG衛冕冠軍！！！雖然PSG冇曬香港人，但係佢哋都代表住我哋PCS賽區。我哋要繼續支持佢哋征戰MSI呀！FAK仲寫緊佢哋嘅故事，之後仲有夏季賽，相信未來嘅FAK只會更強！大家一定要繼續支持FAK、香港人、PCS！！！
相關連結
PCS Twitch粵語頻道：https://www.twitch.tv/lolpacifichk
