【賽前預測】PCS 2023 春季季後賽

PCS 2023 春季季後賽將會喺3月23號(三)開始,今年除咗有6隊台港澳戰隊之外,仲有2隊大洋洲戰隊一齊爭奪冠軍寶座同MSI參賽資格。接住落嚟我會簡單分析每隊戰隊,分析自己心目中嘅排名預測。

1. PSG Talon (PSG)

論下路雙人組PSG敢認第二冇人敢認第一,唯一一隊能夠駕馭凱特琳。下路選手Wako平均每分鐘傷害840,全聯賽最高。打野選手JunJia勝率100%,有佢上場全隊表現明顯提升。不過中路選手ubao常規賽只用過5隻英,全聯賽最少。佢征戰賽場多年英雄池冇理由咁少,唔知PSG係咪藏招應付季後賽。

2. Frank Esports (FAK)

FAK整體英雄池深厚,B/P多變化,季後賽打BO5可以發揮B/P優勢。3路選手喺聯賽嚟講算頂尖,少數可以打三叉戟嘅隊伍。令人擔心嘅係打野選手Holo,擊殺參與率只有59%,全聯賽打野位置最低。FAK非常依賴輔助選手Kaiwing做Shotcaller,佢玩軟輔或者下路冇辦法打出優勢嘅時候,全隊表現明顯下降。

3. CTBC Flying Oyster (CFO)

CFO上中野都係聯賽頂尖選手,係另一隊可以打三叉戟嘅隊伍。同FAK相反,輔助選手S1aytrue未能吸收前輔助選手/現任教練Koala嘅經驗,指揮能力不足。佢哋只能依靠經驗老到嘅打野選手Gemini,導致佢哋中後期表現未如理想。

4. Beyond Gaming (BYG)

BYG特別之處在於打野選手Kongyue,佢嘅首殺率53%全聯賽最高。不過佢需要隊友圍住佢打,唔適合依家Meta。輔助選手Kino嘅指揮能力一直都令人詬病,唔識玩軟輔都係一個大問題。雖然佢哋前期多數都有經濟領先,但係佢哋中後期嘅決策做得唔夠好,好容易俾對手翻盤。

5. Impunity (IMP)

IMP風格依賴前期對線,再利用前期優勢分推營運。中路選手Mission 15分鐘對位經濟領先平均662,不愧係PCS Faker,依舊保持壓制力。不過只要佢哋前期打唔出優勢,去到中後期缺乏睇準時機翻盤嘅機會,基本上就宣告戰敗。

6. Deep Cross Gaming (DCG)

DCG選角有啲似歐美嗰邊,可以攞唔同嘅英雄出嚟。中路選手Nestea 18場用咗12隻英,全聯賽中路位置第二高,佢嘅獨特理解令對手唔習慣同佢對線。輔助選手Orca以軟輔為主,變相隊伍依賴上中野 3人開團,唔肯定佢識唔識玩硬輔。

7. Team Bliss (TB)

TB打法激進,注重前期經濟領先。韓援中路選手Daystar 16場用咗14隻英,係LCO賽區單殺王。下路選手Leemas會玩前期壓線英,例如達瑞文、凱特琳、路西恩等等。輔助選手基本上只玩軟輔。

8. Chiefs Esports Club (CHF)

CHF唔少選手都有國際賽場經驗,最有印象係上路選手BioPanther。佢哋比較鐘意打團中路選手Kisee同樣係LCO賽區單殺王。下路選手Raes平均每分鐘傷害747,全LCO聯賽第二高。

以上僅代表個人立場, 與團隊無關。由於唔熟悉大洋洲賽區,只能夠參考返過往兩個賽區交手記錄。你哋對於佢哋嘅實力又有咩睇法呢?

相關連結

PCS Twitch粵語頻道:https://www.twitch.tv/lolpacifichk

Leave a Comment

Your email address will not be published. Required fields are marked *

error: Content is protected !!