2023 PCS 春季賽終於開打啦！！！我哋梗係要支持本土戰隊FRANK Esports（FAK）啦。
雖然今年YSKM離隊轉戰LPL，但係FAK搵到喺ASCI大放異彩，人稱香港劍仙嘅Solokill接手上路位置。除此之外，佢哋仲搵到香港第一輔助Kaiwing加盟，絕對係一波大補強。接住落嚟，我會分析佢哋頭兩場賽事，希望大家更加了解今年嘅FAK。
VS HELL PIGS（HPS）
HPS係亞洲統神張嘉航嘅戰隊，本來佢諗住親身上陣，不過因為工商理由唔可以上場。更加有趣嘅係，聽講呢隊暫時冇教練同分析師。佢哋嘅選手出道唔係好耐，上路Taco上年表現唔錯，值得留意一下。
FAK：吶兒、茂凱、阿卡莉、婕莉、露璐
HPS：卡桑帝、菲艾、阿祈爾、路西恩、娜米
開局HPS打野入侵FAK嘅紅buff野區，成功偷走六鳥之餘仲單殺茂凱。之後利用經驗優勢，6分鐘佢喺下路卡經驗上六捉死露璐。9分鐘FAK喺小龍河道發現菲艾，不過HPS中下路及時支援，FAK反而俾HPS包夾，HPS打出0換2。
17分鐘半雙方爆發小龍團戰，FAK喺落後3000經濟嘅情況下，阿卡莉切入HPS後排打出4013點傷害，FAK打出0換4，亦成功阻止HPS攞聽牌龍，經濟反超HPS。
22分鐘半雙方爆發巴龍團戰，雖然FAK攞下巴龍，但係HPS打出0換4，仲要攞到聽牌龍，攞返優勢節奏。 30分鐘半雙方再次喺巴龍河道打起上嚟，HPS菲艾同卡桑帝控到婕莉沒辦法輸出，依舊打出0換4，攞下巴龍。最終HPS一鼓作氣發動最後攻勢，成功擊潰FAK嘅防守獲勝。
VS PSG Talon（PSG）
PSG都係香港戰隊嚟㗎，不過佢哋進行大換血，香港選手Unified同Kaiwing離隊之後，呢隊就冇晒香港人嚕。今年佢哋引進聯賽入面一、二線嘅選手，不過教練團依舊豪華，除咗保留冠軍教練CorGi之外仲引入前EDG教練Zero。
PSG：吶兒、史瓦妮、阿祈爾、路西恩、娜米
FAK：卡桑帝、茂凱、維克特、克黎思妲、納帝魯斯
開局納帝魯斯喺小龍河道做視野俾人捉到，PSG攞下首殺。隨後佢哋三包一塔殺克黎思妲失敗，茂凱趕到攞下娜米嘅人頭。前期FAK利用茂凱分割戰場同克黎思妲容易攞到地圖資源嘅優勢，15分鐘已經攞到2條小龍加2隻預示者。
18分鐘雙方爆發小龍團戰，PSG本來諗住阿祈爾開大推FAK中下，接吶兒大技連環控制。結果FAK中下及早閃現逃脫，令PSG計劃落空，反而俾咗FAK反擊嘅機會。FAK打出0換3，攞下聽牌龍。
23分鐘半雙方喺中路爆發團戰，吶兒開大推到FAK中下，阿祈爾有機會接大繼續控制。結果Solokill卡桑帝開大拉走阿祈爾，仲要以500血嘅狀態反殺滿血嘅阿祈爾。FAK打出1換3，攞下巴龍，亦解鎖風龍魂。
30分鐘雙方喺中路爆發團戰，FAK卡桑帝繞後帶領隊伍擊殺PSG下輔，攞下第二條巴龍，經濟領先9000。接住落嚟FAK捉到落單嘅史瓦妮，攞下遠古巨龍。最終PSG無力抵擋FAK嘅推進，FAK收穫賽季首勝。
VS J Team（JT）
JT上年夏季打出隊史最差成績，今年展開咗重建，淨係留底輔助選手Enso。打野選手Fung係香港人，不過暫時仲未有上場。下路選手Bruce之前打咗一陣比賽就轉戰手遊激鬥峽谷，而家返嚟英雄聯盟，唔知實力keep唔keep到呢？
FAK：剛普朗克、伊莉絲、星朵拉、路西恩、娜米
HPS：雷尼克頓、史瓦妮、奧莉安娜、婕莉、露璐
開局剛普朗克大技配合打野成功捉下路婕莉拎到首殺。14分鐘利用對線優勢，FAK經濟已經領先2500，仲有2條小龍喺手。
24分鐘半，已經攞咗3條小龍嘅FAK準備爭奪第4條小龍。FAK伊莉絲站位失誤俾人捉到，路西恩過去救佢，結果犧牲埋自己，FAK龍魂俾人截胡。
31分鐘雙方爆發小龍團戰，剛普朗克二連桶將史瓦妮同婕莉打到半血。伊莉絲閃綁婕莉，路西恩跟上同婕莉1換1。Solokill閃現追擊，喺隊友未跟上嘅情況下擊殺雷尼克頓同奧莉安娜，仲要成功逃脫。FAK打出1換3嘅團戰，解鎖水龍魂。
33分鐘雙方爆發最後一波團戰，JT集火伊莉絲俾佢成功逃脫，FAK隊友救援收割對手，打出0換3嘅團戰，獲取2連勝。
TLDR
FAK最後以2-1結束Week1旅程！！！雖然第一場輸比地獄豬令人大跌眼鏡，但係經過一晚調整之後，無論係團隊決策定係大家睇完第一場都好擔心嘅Solokill個人表現都進步咗好多，仲連攞2場MVP。值得留意嘅係，FAK 3場都選用唔同風格嘅陣容，願意採用唔同嘅戰術。而Kaiwing嘅加入更加令FAK成個戰術執行更上一層樓，令人更期待佢地下星期嘅表現！
相關連結
PCS 官方粵語直播合作伙伴： Nexten
PCS Twitch粵語頻道：https://www.twitch.tv/lolpacifichk
