上個禮拜本土戰隊FRANK Esports（FAK）以2-1結束Week1旅程。雖然佢哋爆冷輸比地獄豬，但係經過調整之後，佢哋整體嘅表現回穩咗好多。接住落嚟，我會分析呢個禮拜嘅賽事，一齊睇下佢哋表現如何。
VS Beyond Gaming（BYG）
熟悉PCS嘅讀者都知道BYG係前職業選手丁特嘅戰隊。今年佢哋重用中路選手茂安，亦提拔大部分二隊選手。值得嘉許佢哋願意提拔新人上場，不斷為PCS賽區帶嚟新血。
FAK：卡桑帝、史瓦妮、杰西、希維爾、悠咪
BYG：卡蜜兒、悟空、斯溫、法洛士、艾希
開局7分鐘FAK下路單殺艾希，同時間史瓦妮亦入侵對方野區單殺悟空。隨住打野不斷遊走支援，FAK 14分鐘已經領先5000經濟。
15分鐘雙方爆發預示者團戰，雖然悟空繞後先行秒殺希維爾，但係FAK本身有巨大經濟優勢，唔影響佢哋嘅團戰表現，以1換3，攞下預示者。更加離譜嘅係核彈悠咪打出2180點傷害，單場團戰最高輸出。
24分鐘半史瓦妮配搭悠咪喺對方野區2打4。雙方隊友到場之後FAK上演一場大屠殺，先喺野區擊殺BYG 3人，再5人塔殺剩低兩名對手。FAK打出0換5嘅完美團戰，攞下巴龍。26分鐘杰西整局比賽最高輸出，打出14063點傷害，僅僅高過悠咪500點傷害。
28分鐘，BYG完全阻擋唔到FAK嘅推進，FAK獲勝。
VS Impunity（IMP）
IMP今年放棄採用韓援，改用全台班。中路選手係人稱電競傭兵嘅Mission，今年已經係佢第13隊戰隊，唔知佢會唔會keep到PCS Faker嘅榮譽，繼續主宰PCS中路呢。
IMP：關、菲艾、雷茲、路西恩、娜米
FAK：卡桑帝、史瓦妮、卡莎碧雅、婕莉、悠咪
開局10分鐘半史瓦妮捉IMP下路，婕莉雙殺。其後FAK召喚預示者，直接攻破下路一塔。
16分鐘半，上路關單殺卡莎碧雅。與此同時，雙方喺中路爆發團戰。菲艾先捉婕莉，奈何隊友跟唔上，婕莉成功逃脫。卡桑帝傳送趕到戰場，FAK反打擊殺雷茲，攞下聽牌龍。
20分鐘半，菲艾先行捉死史瓦妮，IMP乘勝追擊FAK其他人。FAK喺少打多嘅狀態下決定反打，帶走IMP中下路3人，轉身打巴龍。IMP上野搶龍失敗，白白犧牲。
最終，FAK手握巴龍魂同火龍魂，擊潰IMP嘅防守，FAK獲勝。
VS SEM9 WPE（S9W）
S9W由馬來西亞戰隊SEM9同菲律賓戰隊West Point Esports合作組隊。上路、中路、下路選手都係菲律賓人，而打野同輔助選手都係香港人。打野選手Fiya上年打過亞洲盃，今年第一次征戰職業聯賽，輔助選手Keres離開FAK之後加入S9W。
FAK：賈克斯、伊莉絲、犽凝、凱莎、雷歐娜
S9W：古拉格斯、茂凱、伊瑞莉雅、剎雅、睿娜妲
開局1分30秒，兩邊中路1等對拼，犽凝單殺伊瑞莉雅，取得首殺。3分鐘半，伊莉絲塔殺下路帶走剎雅。剎雅復活之後立即組織一波塔殺，擊殺睿娜妲，茂凱趕到換走雷歐娜。與此同時，伊瑞莉雅單殺犽凝完成復仇。
7分鐘，雙方中野喺中路對拼，打出0換2，攞下今場第一條龍。14分鐘FAK打出1換1嘅團戰，攞下第二條龍，經濟領先超過6000。
18分鐘，Solokill賈克斯閃暈S9W上野輔3人，喺隊友幫助下帶走佢哋。20分鐘賈克斯同樣outplay暈S9W 4人，帶領隊友團滅S9W，攞下巴龍。
最終，FAK勢如破竹攻破對手主堡，FAK獲勝。
TLDR
FAK最後以全勝結束Week2旅程！！！佢哋除咗贏緊5連勝，仲同CTBC Flying Oyster並列聯賽第一。下個禮拜日兩隊交戰，將會決定邊個先係PCS第一。期待FAK下個禮拜嘅表現，大家一定要支持佢哋呀！
相關連結
PCS 官方粵語直播合作伙伴： Nexten
PCS Twitch粵語頻道：https://www.twitch.tv/lolpacifichk
