PCS 2024 春季賽將會喺1月19號（五）開打。
新年新面目，今年PCS嘅賽制同以往有好大改變。我已經做好功課啦，等我嚟話俾大家聽啦~
上個賽季，PCS重新實行升降賽制度。雖然PSG Academy戰隊同Nate9527成功升班，但係基於某啲原因佢哋唔會參與新賽季，導致新賽季戰隊由10隊減至8隊。由於戰隊數量減少，PCS決定改變賽制，務求比賽更加精彩好睇。
首先PCS 2024例行賽跟返以前LMS咁採取BO3 3局兩勝制，相對BO1，呢個賽制會減少弱隊以下剋上嘅爆冷場面，令強隊表現更加穩定。BO3亦係大多數國際賽採用嘅賽制，習慣咗呢個賽制，出國隊伍相信會有更穩定嘅發揮。
例行賽又分為兩個階段。第一階段係單循環賽程，冇咩特別。第二階段會根據第一階段嘅戰績分成上半區（頭四）同下半區（尾四），同區戰隊再一輪單循環賽程。同區戰隊實力差唔多，每場比賽都keep住咁刺激，觀眾都會睇得特別過癮。上半區戰隊直接鎖定季後賽資格，只影響佢哋嘅種子排序。下半區戰隊就會爭奪最後兩個季後賽名額。由此可見，第一階段每場比賽都會好重要，提前鎖定季後賽資格點都會輕鬆好多。值得一提嘅係，今季會單挑決定BO3第一場嘅選邊權，如果有直播嘅話一定會好fun。
今季季後賽除咗有六隊PCS戰隊同兩隊LCO戰隊之外，仲有三隊LJL戰隊。以雙敗淘汰制打BO5，爭奪國際賽名額。LJL賽區實力不容忽視，PCS戰隊想出國需要一定嘅競爭力。
簡單啲講，今季避免強隊對弱隊嘅情況，每場比賽都會精彩同重要好多。