隊伍介紹

【隊伍介紹】PCS 2024 Frank Esports戰隊

雖然上年Frank Esports(FAK)成績有所進步,但係佢哋始終喺季後賽倒下,離出國僅一步之遙。今年佢哋繼續補強選手陣容,仲打破傳統引進台灣選手,務求達成夢想。接住落嚟會介紹佢哋嘅選手陣容,希望大家更加了解今年嘅FAK。 TOP – Jiang 上年香港劍仙Solokill選手回歸EDG戰隊,不過今年FAK又有一位台灣劍仙啦。Jiang選手main雷玟,而家真係見少有少。今季開季冇耐佢就已經打上韓服大師,雷玟勝率仲超過7成!不過佢冇乜賽場經驗,現階段冇辦法評論佢嘅比賽表現。呢幾年FAK上路都係操作型選手,大家可以期待佢嘅精彩操作。 JG – Gemini 唔通今年係HKA 2.0?!Gemini選手同MnM選手、Kaiwing選手之前喺HKA合作過,對大家都有一定嘅熟悉。佢屬於全能型選手,B/P可以迎合隊伍嘅需要,上至野核下至坦角都攞到出嚟。佢喺HKA嗰陣曾經打入世界賽,唔同佢今年又可唔可以為香港戰隊帶嚟奇跡呢? 中路 – JimieN 今年FAK有JimieN同Pretender兩位中路選手。JimieN選手一直都有同Gemini選手合作,默契上一定比Pretender選手好。佢亦有旅美同大賽經驗,了解唔同賽區嘅風格。Pretender選手係創隊元老,一直都係隊內carry,亦了解隊伍嘅風格,清楚隊伍嘅需要。講真我唔知佢哋邊個會係正選,希望佢哋一齊競爭,一齊進步。 AD – MnM MnM選手係另一個創隊元老,係隊內穩定carry。無論對線定打團都樣樣得,只要佢未死就有贏嘅可能。佢出道以嚟都一直為香港戰隊效力,今年已經係第六年征戰賽場,希望佢可以攞到人生第一冠啦。 輔助 – Kaiwing 老大哥仲喺度!休賽期流傳過Kaiwing選手退役,大家都好震驚,香港冇佢就等於韓國冇Faker!之前大家都話Kaiwing選手唔玩硬輔成隊表現都會大打折扣,而家Gemini選手嘅英雄池同指揮能力就可以卸下Kaiwing選手唔少壓力,佢哋野輔聯動一定事半功倍! ⸻大家對FAK今年選手陣容有咩評價呢?佢哋將會喺1月20號(六)下晝5點迎嚟今年首show,大家一定要睇直播支持佢哋呀!重鑄香港榮光,我輩義不容辭!!!

【隊伍介紹】2023 LEC 冬季季後賽

今年LEC賽區進行大改革,賽制改成一年三個賽季,分別係冬季賽、春季賽同夏季賽。每一季又分為常規賽、小組賽同季後賽。三個賽季冠軍同全年積分最高三隊又會參加全年總決賽,到時會決定全年總冠軍同世界賽參賽資格。今年MSI開放LEC賽區兩個名額,冬季賽同夏季賽冠軍都會獲得參賽資格。2023LEC冬季賽已經嚟到季後賽,一齊睇下季後賽有邊四隊啦。

error: Content is protected !!