FRANK Esports（FAK）上個禮拜以5連勝結束Week2旅程。呢個禮拜PCS將會完成首輪賽程，一齊睇下FAK能唔能夠延續佢哋嘅連勝。
VS Deep Cross Gaming（DCG）
上年春夏季賽都以第4名結束嘅DCG今年冇大變動。上路引進Hanabi，一直以嚟表現都非常出眾，輔助引進Orca，LSC第六屆冬季賽冠軍。佢哋出嘅meme圖都幾高質，為PCS賽區帶嚟唔少樂趣。
DCG：吶兒、悟空、麗珊卓、凱特琳、拉克斯
FAK：伊瑞莉雅、菲艾、阿祈爾、法洛士、艾希
開局6分半DCG上中野塔殺伊瑞莉雅獲取首殺。12分鐘DCG中野塔殺阿祈爾，與此同時FAK下輔配合打野擊殺DCG下路雙人線。
16分鐘伊瑞莉雅單殺吶兒，可惜俾防禦塔擊殺。24分鐘半伊瑞莉雅單走俾DCG捉到，DCG帶走佢之後攞下聽牌龍。26分鐘麗珊卓卡視野捉到艾希同菲艾，DCG帶走佢哋之後攞下巴龍。
30分鐘麗珊卓喺中路先手控住阿祈爾，DCG集火阿祈爾俾佢成功逃脫，FAK反打帶走悟空。接住落嚟雙方轉移戰場去小龍河道。FAK攞咗小龍後撤退，DCG唔放佢哋走，下定決心4打5同FAK開戰。麗珊卓繞後切FAK後排，雖然麗珊卓犧牲自己，但係DCG打出團滅。
FAK俾人團滅之後，DCG一氣呵成推爆FAK主堡，DCG獲勝。
VS Dewish Team（DWT）
上年夏季賽墊底嘅DWT今年淨係更換下輔組合，引進Pocky同EnHoa。呢隊嘅特色係佢哋採用中援而唔係韓援。究竟佢哋會唔會延續佢哋嘅爐主之位呢？
FAK：雷尼克頓、伊莉絲、杰西、希格斯、雷歐娜
DWT：古拉格斯、卡爾瑟斯、崔絲塔娜、法洛士、布朗姆
開局4分半FAK想塔殺下路雙人線，無奈DWT中野反蹲。雖然雷歐娜攞到首殺，但係DWT換到希格斯同伊莉絲嘅人頭。好彩杰西趕到下路，配合雷歐娜捉到布朗姆，人頭差打和。
8分鐘雷尼克頓發揮線上優勢入侵對手紅buff野區，單殺卡爾瑟斯。FAK野下輔3人眼見對手打野陣亡就攞小龍，攞完之後捉到DWT下路兩人，無奈佢哋配合安魂曲反殺雷歐娜。FAK淨低兩個撤退到下路一塔，可惜希格斯俾DWT塔殺帶走。
19分半FAK發揮陣容優勢，伊莉絲單打聽牌龍，同時間杰西同希格斯喺中路先poke殘DWT 5個，DWT殘血撤退唔到，俾杰西4連殺。
22分半DWT再一次俾人poke殘，喺上路撤退，伊莉絲繞後留住佢哋DWT 3C陣亡，FAK攞到巴龍。
最終，FAK勢如破竹攻破對手主堡，FAK獲勝。
VS CTBC Flying Oyster（CFO）
CFO上年夏季賽奪冠，今年衛冕野心不滅，只更換中輔兩路。中路選手JimieN由北美次級聯賽回歸，而輔助選手s1aytrue亦征戰過LPL，相信佢哋嘅海外留學經驗對CFO帶嚟一定嘅幫助。CFO今年陣容依然鼎盛，佢哋能唔能繼續統治PCS賽區係觀眾關注重點之一。
FAK：剛普朗克、史瓦妮、賽勒斯、希格斯、雷歐娜
CFO：賈克斯、菲艾、勒布朗、凱莎、艾希
開局8分鐘CFO上中野塔殺剛普朗克，剛普朗克先開大清線，後閃現避菲艾強能沖拳。勒布朗坦塔殘血俾趕到嘅史瓦妮首殺。
11分半CFO以4打3開戰，佢哋以為多打少贏硬，計漏剛普朗克同希格斯大技支援。FAK實質5打4，以1換2打贏團戰。
14分鐘雙方喺巴龍河道爆發團戰，FAK先開艾希，傷害跟唔上，艾希成功逃脫。菲艾鎖頭希格斯，凱莎跟上，希格斯閃現逃脫。FAK轉移目標擊殺菲艾同凱莎，賈克斯趕到，帶走殘血嘅史瓦妮之後閃現逃脫。賈克斯捉到殘血嘅希格斯，希格斯臨死之前留住賈克斯。FAK剩餘隊友趕到帶走賈克斯，再塔殺勒布朗。
17分半雙方爆發預示者團戰，賈克斯單走俾人捉，凱莎同艾希趕到，3打5嘅情況下帶走剛普朗克就陣亡。與此同時CFO剩餘兩人偷打預示者，挽回少少劣勢。
31分鐘FAK先rush巴龍，賈克斯同菲艾切FAK後排吸引火力，其餘3人集火收走賽勒斯。FAK持續傷害唔夠冇力還擊，CFO 0換5團滅FAK，巴龍龍種全無。
34分半菲艾鎖頭希格斯，勒布朗同凱莎跟上秒殺希格斯。FAK失去輸出核心敗走，CFO 1換5團滅FAK。
FAK冇人防守主堡，CFO獲勝。
TLDR
FAK最後以6-3結束第一輪賽事！！！雖然呢個禮拜只贏一場，但係同對手有來有往。經過檢討之後FAK只會越嚟越強，大家一定要支持FAK呀！！！
相關連結
PCS 官方粵語直播合作伙伴： Nexten
PCS Twitch粵語頻道：https://www.twitch.tv/lolpacifichk
