【隊伍介紹】2023 LEC 冬季季後賽

今年LEC賽區進行大改革,賽制改成一年三個賽季,分別係冬季賽、春季賽同夏季賽。每一季又分為常規賽、小組賽同季後賽。三個賽季冠軍同全年積分最高三隊又會參加全年總決賽,到時會決定全年總冠軍同世界賽參賽資格。今年MSI開放LEC賽區兩個名額,冬季賽同夏季賽冠軍都會獲得參賽資格。2023LEC冬季賽已經嚟到季後賽,一齊睇下季後賽有邊四隊啦。

G2 Esports(G2)

上年夏季賽亞軍,世界賽小組賽出局。成績未如理想嘅G2今年進行大換血,只保留上中路。打野老臣子Jankos離隊,新秀Yike補替。下輔組合係旅美回歸嘅Hans Sama同老面孔Mikyx。

G2比賽選角出名唔跟meta,佢哋嘅經驗同實力令佢哋充滿自信,成就佢哋獨有嘅戰隊特色。Yike以野核為主,同現行工具人meta唔同。下輔組合一齊打過比賽,早就有一定嘅磨合。然而,佢哋今年輸嘅場次,大部分選角都唔係meta英,冬季賽常規賽只能夠排第四。

傳統勁旅G2經過大換血之後依舊保持競爭力,期待佢哋發揮武士精神,重回冠軍寶座。

KOI

上年夏季賽冠軍Rogue今年同KOI聯手,以KOI之名征戰LEC聯賽。今年佢哋嘅選手同教練團陣容大致相同,只有上路Odoamne換成更加年輕嘅Szygenda。

雖然KOI陣容冇乜大變動,磨合上應該少問題,但係佢哋喺冬季賽常規賽排第七,狀態明顯比較低迷。去到小組賽,佢哋狀態回勇,喺一小場都冇輸嘅情況下晉級季後賽。佢哋通常以中下為核心,上野多數都係坦克或者工具人。

雖然KOI冇咗經驗老到嘅上路選手,但係年輕人總有成長空間,期待上路選手Szygenda嘅表現,讀者不妨一齊見證佢哋嘅衛冕之旅。

SK Gaming(SK)

SK今年絕對係黑馬,隊伍冇明星選手或者教練,佢哋嘅LEC聯賽經驗唔超過兩年,下輔組合仲要係新人。

上路選手Irrelevant可坦可C,隊伍戰術可以更多變化。中路選手Sertuss英雄池厚,冬季賽小組賽選角都唔同。佢哋配合默契,面對強隊都有一戰之力。佢哋啱啱將冬季賽常規賽第一,擁有前T1二隊上路、曾登頂韓服打野、法王中路嘅Team Vitality 2比0送返屋企,令人大開眼界。

SK嚟到呢度已經創下隊伍最佳戰績,期待一班年輕人嘅表現,寫下黑馬傳奇。

MAD Lions(MAD)

MAD今年保留中野進行補強,上路引進韓援Chasy,下路Carzzy回歸,輔助Hylissang加盟。

上路選手Chasy可坦可C,聯賽唯一一個菲歐拉全勝。中路選手Nisqy英雄池厚,冬季賽小組賽選角都唔同。人稱嗨了送嘅輔助選手Hylissang依舊令人擔心,有時會迷之送頭。

傳統強隊MAD實力唔可以忽視,期待佢哋發揮獅子精神,再創佳績。

2023LEC冬季季後賽將會喺2月21號開打,2月27號完結。究竟邊隊會得到勝利女神嘅眷顧,將冠軍攞返屋企呢?

1 thought on “【隊伍介紹】2023 LEC 冬季季後賽”

Leave a Comment

Your email address will not be published. Required fields are marked *

error: Content is protected !!