喂喂喂！琴晚（30號）喺會展舉辦嘅Mercedes-Benz Hong Kong League of Legends Tournament 2022 冠軍賽有冇睇呀？好精彩喎
呢個比賽由祈祈幫ProMax以2:0直落贏取冠軍殊榮。咩話？你唔識佢哋？唔緊要，等我哋介紹俾你知啦！
祈祈幫係香港英雄聯盟業餘比賽嘅熟面孔，贏過大大小小唔同嘅比賽。佢哋具備豐富嘅職業賽場經驗，提升團隊嘅執行力同紀律性，令遊戲嘅營運更加流暢
今年4月佢哋喺香港電競超級聯賽第二季英雄聯盟勇奪冠軍，有機會成為香港亞運電競代表隊嘅一員，衝擊亞運獎牌
經過幾次嘅成員變動，佢哋嘅陣容已經嚟到4.0版本啦，咁就由我哋逐一介紹俾大家啦！
上路選手浮白悠
以鬥士風格聞名，菲歐拉絕活哥，絕對有carry嘅能力。琴晚表現非常亮眼，特別係game 2嘅厄薩斯，出現唔少以少打多嘅畫面。
打野選手Glorious1
在隊伍嘅定位上偏向搵節奏、工具人，可能係因為三路都可以 carry，佢要做嘅工作就係保護隊友，以掌握物件為主，不過都有攞過野核角色。
中路選手Im your choice
卡特蓮娜絕活哥。琴晚表現非常亮眼，特別係game 1嘅賽勒斯簡直係魔王級嘅存在，有佢喺度團戰想輸都難。
下路選手Nabi2
前PCS職業聯賽Alpha Esports戰隊選手，隊伍嘅絕對核心，非常願意俾佢揀後期大核射手。打法非常穩健，佢對線唔太會刻意壓制對手，但係你想從佢身上打出破口簡直係發夢。
輔助選手娜娜依祈
曾效力LPL職業聯賽Invictus Gaming嘅青訓隊，非常擅長軟輔，例如露璐、巴德等英雄。依家同咪咪蛋、西門、小夜夜、BEBE等LMS職業聯賽傳奇選手組成新五毒教，征戰緊2022亞洲盃比賽。
香港嘅業餘比賽其實都唔差㗎，好多選手都會被睇中，成為職業選手。今年新建嘅PCS職業聯賽FRANK Esports戰隊上路選手YSKM同中路選手Pretender就係嚟自祈祈幫。佢哋同另一支本土戰隊PSG Talon都衝擊緊今年PCS夏季賽嘅前段班，祝佢哋能夠攜手晉級嚟緊9月喺北美洲舉辦嘅世界大賽。大家一定要幫佢哋打氣
重鑄香港榮光，我輩義不容辭！
圖片來源：Cyber Games Arena
