電競賽事最大醜聞！到底係Grey Hat定係遊戲破壞者？
近日Apex Legends發生電競賽事史上最大醜聞，並唔係集體賭博，又唔係種族歧視，而係官方比賽ALGS被Apex Legends著名黑客Destroyer2009同R4ndom hack入，並對Dark Zero Genburtan同TSM ImperialHal分別開啟透視自瞄同自瞄外掛，其問題嚴重性直接導致比賽緊急停止，擇日再戰。
其實早前英雄聯盟韓國聯賽LCK都有被網絡攻擊，導致T1同FOX嘅比賽延誤咗7個鐘，官方事後使用線下伺服器迅速解決問題。兩者都係被黑客攻擊，不過我認為Destroyer2009同R4ndom嘅行為比起英雄聯盟hacker嚟得更有野心。
Destoryer2009同R4ndom以前已經做過一啲好高調嘅hacking行為，例如喺知名選手兼實況主Mande嘅台當面召喚一堆機械人喺遊戲裏面攻擊佢同埋又送幾千個遊戲造型箱俾佢，已經引起高度關注，但Apex Legends官方依然不聞不問，直到今次事件發生，重生社（Respawn Entertainment）不得不認真處理外掛同「薯仔」伺服器嘅問題。
最近Destroyer2009接受TechCrunch嘅訪談，提到佢hacking嘅原因，主要係因為好玩，同埋其次希望用呢個方式迫使Apex官方處理佢使用嘅漏洞；另外佢亦提到一個幾有趣嘅事，就係佢冇回報漏洞係因為EA同重生社都冇漏洞回報獎勵，同埋認為官方一定知道點樣修復，所以佢哋唔需要其他人回報；佢又提到佢大可以完全隱藏自己嘅行蹤，但係佢知道會直接摧毀選手嘅職業生涯，因此佢喺外掛介面加入「投票俾普京」嘅memes同埋全頻自己嘅名同來意。
目前透過訪談可以了解到Destoryer2009並唔係惡意攻擊，而且佢過往亦冇出售外掛或使用，只係用嚟「博流量」；而且佢有暗示EA同重生社對於自己嘅伺服器同系統太過有自信，所以先會搞到外掛氾濫、隨意「炸房」嘅問題陰魂不散。
咁到底Destoryer2009算係破壞者定係Grey Hat呢？利用漏洞攻擊ALGS server導致比賽延期，不過迫使官方認真處理外掛同伺服器問題；當然佢一路做嘅嘢都唔係好事，不過今次事件大部分玩家都係支持佢，ImperialHal自己都有暗示持續開槍同唔離開遊戲嘅原因係要搞大件事，因為Game 3 Genburtan被hack之後官方仍然若無其事繼續比賽，全因希望官方認真看待問題。
事情暗暗同或一個好出名嘅作品不謀而合，同樣做違法行為，同樣執行自己嘅正義，同樣受大眾批評和支持，同樣係獨行俠。稱佢為蝙蝠俠並不為過。
備註：灰帽黑客（Grey Hat）係一個黑客或者電腦保安專家。他們有時可能會違反法律或者典型嘅道德標準，但不具有黑帽黑客（Black Hat）典型嘅惡意意圖。佢哋嘅目的可能只係為咗好玩，或者溫馨提示公司網絡保安存在漏洞，不過會收取少少費用，又或者為咗宣揚一啲價值觀同理念。
撰文：Angus
