電競史上最具爭議性事件之一 —— 《聯盟戰棋世界賽—S13假賽風波最新判決》
話說我地先前就報導咗Shitouren（石頭人）疑似喺Set 13世界賽放水比同為中國區選手Liluo晉級而引起爭議，Riot官方最初就表示根據Shitouren賽後嘅口供同埋佢地嘅判斷，認為搵唔到證據證明兩位選手事前有利益交換或者事前協議，所以唔會對兩位選手作出處分。不過係琴晚Riot全球電競總監Michael Sherman就作出咗重大更新：
由即日起，Shitouren 被禁賽到2025年7月14日，期間唔可以參加Set 14任何Riot官方賽事，同時亦要交返Set 13棋手皇冠盃嘅所有獎金。
雖然當時Shitouren就有解釋話當時太緊張、唔熟悉用電腦打國際賽、太攰等等嘅原因導致犯下錯誤，而官方亦一度表示佢地認為Shitouren嘅不合理操作係孤注一擲而唔係故意讓賽(Shitouren’s questionable decisions “wasn’t enough to indicate intentional underperformance at the time,”)。但官方喺重新審查後，最終改判認為佢當局嘅表現同佢其他局數嘅表現相差太遠，亦唔係一個世界賽等級選手會有嘅失誤，最後決定改判。
Sherman講到，佢哋當日為咗快啲定到晉級決賽名單，做咗個「過急嘅裁決」，(We rushed a call, and we made a mistake)。而係比賽結束後，佢地搵到更加多嘅證據同線索，並且再一次同Shitouren對話之後，官方確定佢喺嗰場比賽入面有唔公平作賽嘅行為(Win Trading)。不過Sherman都有強調，暫時無任何證據證明Shitouren同其他選手有勾結，所以就算當日即時對Shitouren作出處分，決賽晉級名單都唔會改變。
同時官方為咗確保未來比賽能夠公平公正，未來會由以下三個方面著手：
1. Riot 未來將會推出選手作賽前必須閱讀嘅相關資料，包括比賽規章，內容包括對於「表現不佳」嘅標準同埋相關嘅處罰，藉此提升選手對於賽事規範嘅認知。
2. 賽制調整：官方計劃修改世界賽形式，減少因為積分不足但仍然要繼續比賽的選手數量，以避免選手無望晉級但仍然留喺場上嘅情況。日後若果出現呢一類狀況，官方將會安排專人監測嗰位選手的比賽，避免再次出現類似嘅放水事件。
3. Riot 未來亦會改進官方嘅調查流程，確保官方宣佈判決之前能夠全面檢視所有證據，提高判決嘅認受性同埋透明度。
由「唔處分」變到「禁賽+沒收獎金」，你又點睇Riot今次嘅改判？
撰文：叮噹
