物理外掛？
點解職業選手可以做到又快又精準嘅操作？除咗天生反應同埋日積月累嘅肌肉記憶，一套靈敏、可靠嘅外設同樣係關鍵。
覺得自己手速夠快，但係總係差啲啲？會唔會你同職業選手之間，只係差左一個磁軸鍵盤？
今次就同大家講下近年嚟電競圈入面愈嚟愈受追捧嘅磁軸鍵盤，點解佢哋可以成為唔少高端玩家同選手嘅新寵，甚至稱之為物理外掛。
霍爾效應 (Hall Effect)
玩得競技遊戲，鍵盤響應速度可以講係勝負關鍵一環。傳統機械軸鍵盤雖然手感實在，但觸發同重置行程始終有物理限制，市面上可見嘅零售機械軸體最短鍵程都有1.0mm。
而磁軸就唔同，但利用霍爾效應（Hall Effect）感應按壓距離，唔單止可以自定義觸發點，各個廠家不停進步嘅技術之下，已經做及0.01mm精度嘅鍵程調教，仲支援快速重置功能，對於需要高速連點嘅遊戲（比如街霸、VALORANT或CS2）。
為咗方便大家，下面講解全部以較為出名嘅Wooting 60HE為模板，會較為熱悉D。
霍爾傳感器 (Hall Effect Sensor)
磁軸究竟靠咩原理先可以打破機械觸發嘅傳統？同傳統機械軸靠金屬片接觸嚟同，磁軸鍵盤嘅每個按鍵下面都有一粒磁力感應器（霍爾傳感器）。當你按下鍵帽，軸體裏面嘅磁鐵會隨之移動，感應器就會偵測到磁場強弱嘅連續變化。跟住就讓磁軸有咗特別功能，分別係自定義觸發行程，Rapid Trigger同SOCD。
自定義觸發行程
自定義觸發行程：軸體唔再被固定嘅觸發點（例如1mm）綁死。可以透過軟件嘅驅動程式，將觸發點設定在0.1mm到4mm之間任何位置。例如設定為0.1mm，輕輕一揸就已經觸發。對於需要急停嘅遊戲係超級大提升，對比機械軸體當中行程壓力較大且鍵程較長帶來嘅遲滯延遲，A/D左右方向急停會更加得心應手。
Rapid Trigger (RT)
Rapid Trigger (RT)：呢個先係磁軸可以出名嘅原因。傳統鍵盤你要將按鍵完全鬆緩（重置點）之後，先可以再次觸發，而RT就取消咗固定重置點。只要感應到你按壓方向有改變，即係由按下改為鬆鬆抬起，就算未完全鬆開，個鍵盤就已經判定為一次操作結束，並且準備好進行下一次觸發。其實最早呢個功能係音game圈入面出名先，以OSU!為例：Standard同Mania模式都需要連打之類嘅操作，快速連打需要手速同時，又要俾機械軸重置點限制冇得完全發揮實力，RT非常完美地解決呢個難題。
SOCD
一個後輸入優先嘅同時相反方向輸入功能。呢個係格鬥遊戲入面較為出名，SOCD可以令鍵盤輸入嘅指令變得更加乾淨。舉個例子：先輸入左，再同時輸入右，得出嘅指令會先向左行再向右行。
傳統冇SOCD功能情況下，同樣指令輸入會出現左+右變為中立導致原地罰企嘅情況。對於格鬥game，SOCD可以講係近平物理外掛，令指令變得乾淨同準確。CS2入面有類似好處，不過被Valve禁止運用。
Wooting彈出？
愈來愈多《VALORANT》同《CS2》嘅職業選手開始轉用磁軸鍵盤，例如 Wooting、SteelSeries Apex Pro 同 Razer Huntsman V3 Pro 呢類產品。尤其係 Wooting 60HE，幾乎成為唔少歐美選手嘅標配。點解一款咁係傳統機械軸嘅鍵盤可以咁快打入職業圈？
其實就係因為磁軸可以做到近乎零延遲，個性化設置最適合自己嘅觸發速度，令選手可以做出更快、更流暢嘅移動操作。特別係《VALORANT》更加火熱，原因在於In-game急停不同於CS2需要反方向停止慣性移動，只需要鬆開鍵盤就可以做到急停操作，磁軸特有嘅優勢就出現了。
職業選手轉用？
好似係近期嘅《VALORANT》入面表現亮眼嘅選手 TenZ、Demon1，同埋《CS2》嘅職業選手如 ropz、ZywOo 等等，都先後轉用磁軸鍵盤。佢哋普遍反映，用咗磁軸之後，連射、急停同微調準心嘅操作更加得心應手，尤其係喺需要快速響應嘅對槍環境，鍵盤再唔會成為佢哋嘅樽頸。
當然，磁軸鍵盤唔係冇缺點。相比傳統機械軸，手感可能冇咁「實在」，敲打鍵盤發出嘅聲音都較局難聽，同埋價錢普遍偏高。但係如果你係追求極致性能同反應速度嘅玩家，磁軸鍵盤絕對係值得投資嘅裝備。
唔知你哋又係咪都用緊磁軸鍵盤呢？定係仲係忠於傳統機械軸嘅手感？又或者平時用機械打機用磁軸？留言話比我哋知！
（雖然磁軸真係又快又爽，但係手感呢家嘢，真係好個人嘅～）
數據參考：https://prosettings.net