【冷知識】英雄聯盟世界大賽總決賽fun facts知多少
終於嚟到一年一度嘅英雄聯盟世界大賽總決賽啦！！！今年又係經典中韓對決（LPL BLG VS LCK T1），究竟邊隊可以行到最後，登上王座呢？我得啤梨水平就唔做預測，等啲高端人士做啦。不過我可以share下今次決賽嘅fun facts，大家又知幾多呢？
⸻
F閃 VS D閃
大家閃現set喺D掣定F掣呀？今次總決賽將會上演D閃隊（BLG）打F閃隊（T1），佢哋除咗代表自己賽區之外，仲代表緊全球玩家嘅榮耀！我就set F掣嘅，有冇人同我一樣呀？
⸻
全華班
上次全華班打入總決賽已經係2013年啦。當時LPL傳奇AD Uzi帶領Royal Club對決出道即巔峰Faker代表嘅SK Telecom T1。今次同樣挑戰Faker帶領嘅T1，唔知時隔十一年全華班可唔可以夢想達成呢？
⸻
第四種子
呢三年竟然都有第四種子出現。神奇嘅係T1都有份參與其中，2022年輸第四種子DRX，2023年贏咗第四種子WBG，2024年身為第四種子出戰。T1以前都試過第一至第三種子奪冠，今次會唔會儲埋第四種子集郵呀。
⸻
BO5
今次總決賽兩隊都有最強魔咒。BLG MSI BO5從未輸過T1，而T1 世界大賽BO5從未輸過LPL賽區。究竟邊隊會打破魔咒，我哋拭目以待啦！
⸻
宙斯
T1 Zeus真係好勁呀！佢出道以嚟從未錯過總決賽，今次仲可以挑戰史上第一個上路二連冠嘅選手。你問點解得上路？你睇下2015-2016發生咩事先啦。
⸻
左手
今次係BLG knight出道七年以嚟第一次打入總決賽。身為LPL賽區最強中路之一，佢終於有機會證明自己。可惜今年世界大賽冇左右手對決，冇機會睇最強聯盟嘅史詩戰役replay啦。
⸻
大家可以喺下面comment share下仲有啲咩fun facts或者撐邊隊。約定大家11月2號（六）夜晚10點見證曆史時刻啦！！！
撰文：打到對面啤梨水平嘅啤梨君
