【陣容介紹】PCS 2025 Frank Esports戰隊
上年Frank Esports（FAK）離出國僅一步之遙，今年更無緣參加LCP聯賽。正當大家以為FAK會成為歷史，估唔到佢哋官宣會繼續征戰PCS聯賽。我哋又有比賽睇啦！接住落嚟，我會介紹佢哋嘅選手陣容，希望大家更加了解今年嘅FAK。
⸻
TOP
上年Jiang選手表現大受各界關注，今年加盟Ultra Prime戰隊征戰LPL聯賽。不過冇咗佢唔緊要，我哋有YSKM選手強勢回歸！佢打咗兩年LPL聯賽，有唔少精彩操作，單殺過明星上路選手。今年FAK上路會繼續維持操作型傳統，大家可以期待佢嘅精彩操作。
⸻
JG
今年Gemini選手繼續留隊。上年佢嘅英雄池可坦可C，為隊伍戰術帶嚟唔少幫助。作為台港澳打野公認強者之一，又係FAK嘅老大哥，希望佢可以帶領FAK登上PCS聯賽寶座。
⸻
中路
今年JimieN選手加盟Chiefs Esports Club征戰LCP聯賽，而Pretender選手就繼續留隊。上年Pretender選手嘅上陣次數比較少，今年我哋可以睇多啲香港中路比賽啦。佢韓服已經上咗菁英900分，狀態保持得唔錯。
⸻
AD
今年MnM選手轉打Support，Wako選手同樣加盟Ultra Prime戰隊征戰LPL聯賽，FAK搵咗台灣Shunn選手補上空位。Shunn選手上年嘅表現可圈可點，今年嚟到新環境唔知表現如何呢？
⸻
輔助
今年Kaiwing選手加盟CTBC Flying Oyster戰隊征戰LCP聯賽，Support位置由MnM選手補上。之前MnM選手已經喺T1香港粉絲見面會打過一次Support啦，不過嗰次屬表演性質，唔知佢喺職業賽場表現又點呢？
⸻
大家對FAK今年選手陣容有咩評價呢？作為PCS聯賽銀河戰艦，相信佢哋一定可以大殺四方，攞返LCP聯賽參賽資格。佢哋將會喺2月10號（一）下晝5點迎嚟今年首show，大家一定要支持佢哋呀！
撰文：加班就死但都要出文嘅啤梨君
