【賽制介紹】LCP 2025
LCP 2025 將會喺1月18號（六）開打。終於嚟到我哋主場！由今年開始，PCS成為LCP嘅一部分。我已經做好功課啦，等我嚟話俾大家聽啦~
LCP賽區由我哋PCS、日本LJL、越南VCS、同大洋洲OCE組成。今年有兩隊戰隊TALON同CTBC Flying Oyster代表我哋參賽。
今年LCP分為三個賽季，賽季開幕戰、期中賽同賽季決賽。賽季開幕戰採取全新嘅全局BP賽制，一個BO入面兩邊用過嘅英都唔可以再出現。簡單啲講，Game 5會有40隻英冇得揀！跟著同現有賽制差唔多，頭六晉級資格賽，最後冠軍可以參加全新國際賽First Stand 2025。
期中賽開始用返正常BP賽制，雙循環BO1。頭六晉級資格賽打BO3同BO5，最後冠亞軍可以參加MSI 2025。
賽季決賽會根據期中賽成績將八隊分成挑戰者組同突破者組，打單循環BO3。跟住挑戰者組尾二同突破者組頭二打重組賽，勝者上返挑戰者組，敗者跌落突破者組。每組再打BO3嘅雙敗淘汰賽，突破者組尾二淘汰，其餘晉級季後賽，季後賽頭三直接晉級世界賽。
雖然PCS得返兩隊喺頂級聯賽，但係佢哋喺新賽區新賽制下同其他賽區交流切磋。我哋一齊期待PCS代表嘅表現啦！
撰文：顏值擔當啤梨君
