NEVERESTILLTHEND MARCO Choy
SEFHK 人物專訪 EP.07
你當初去台灣讀 E-SPORTS 嘅原因係咩？
其實2018年DSE中文失手，我係諗唔到讀乜。但咁啱放榜之後有個電競圈子嘅前輩，睇完我YouTube嘅影片作品（@NeveResTillThEnd），就帶我接觸關於esports production嘅嘢後工作，我就開始由影片創作轉型去做轉播。
但香港搞電競活動嘅頻密程度唔高，所以我覺得自己無論係經驗或技能方面都好難突圍而出。所以我就產生咗去台灣發掘機會呢種念頭。
我原先去臺灣係讀動畫與遊戲設計，畢竟呢科嘅似電競咁新，所以認可比較高。但後尾我就覺得，反正都一個人異地留學搏到咁，不如搏埋落去！所以就讀返自己一直感興趣嘅電競科。
喺台灣留學期間你個人成長上有咩收穫？
我覺得主要係被呢個環境迫使我去自我成長。老實講，我透過課堂去學到嘅技能近乎係零。因為行咩名師係電子競技出身，所以好難激發學生嘅學習興趣，大家冇共鳴。
不過，好彩我地接到好多出面嘅轉播工作，例如year 1下學期開始每年參加台灣全中運、全大運嘅拳擊賽事轉播。
亦都係因為咁開始接觸咗非電競類嘅活動轉播，令我嘅技能更加多元化。當然，我亦都有接到其他台灣嘅電競比賽轉播，不過最重要嘅都係要靠自己摸索同埋累積實戰經驗，去逼自己成長！！並不斷反思自己嘅不足之處。
PRODUCTION TEAM入面你主要係負責做咩？
我本身係做E-sports嘅OB（Observer）崗位，可以當係遊戲世界入面嘅攝影師，你要將遊戲入面嘅重要資訊帶俾觀眾睇，所以好睇你對某款遊戲嘅熟悉程度。
當我發現自己淨係熟《英雄聯盟》嘅時候，其實對我未來出路好大限制。假若LOL唔再熱門，比賽越嚟越少嘅話，咁變相就唔再需要呢個遊戲嘅OB。所以我先嘗試學習同接觸多啲其他基礎技能，例如點樣構築一個信號系統，跟住就慢慢build up呢啲技能，先至做到所謂嘅總導播。
而總導播呢個崗位，你要睇住成個team每個崗位嘅表現，同埋決定下一個場景需要咩素材。所以你要做到呢個崗位嘅前提係要識曬所有嘢，至少對每個崗位有一定程度嘅了解，咁當某個崗位出咗事嘅時候，你先知道點樣解決個問題。
你覺得作為總導播最需要具備嘅技能係咩？
一定係隨機應變，因為你唔可以驚青！雖然你可能覺得一切都係自己掌握之中順利進行。但好多時候，即使你事先彩排過，但第二日返到會場果陣突然又有幾部電腦死機，或者喺轉播期間，電腦突然冇訊號。
面對呢啲突發情況，你需要有backup方案嚟解決。我都承認自己依家做嘢有啲唔夠穩定，可能會覺得第一日冇問題，第二日應該都無事。但有時候就係會出現意外情況，萬一有一兩部電腦突然開唔到，你點算呢？所以隨機應變好重要，因為你要臨時諗個備案出嚟。
你印象最深刻係邊個項目？
一定係2018新加坡嘅《爐石戰記》冠軍巡迴賽，因為我真係冇諗過會有咁嘅機會。之前提過我DSE放榜冇幾耐，有個前輩（ZETA）搵我做helper，一開始我係幫手搞動漫節主舞台嘅電競活動。之後第二次佢搵我去新加坡《爐石戰記》冠軍巡迴賽，包機票、包食宿。我嗰陣真係好驚訝，自己係一個初出茅廬嘅人，點解會有咁嘅機會呢？甚至質疑自己係咪值得呢個機會…所以呢個項目印象最深刻最難忘！！
你覺得香港現階段電競發展有咩值得同台灣學習？
台灣實習機會的確比較多，因為教育部願意同大學合作搞比賽。跟住老師會輔助學生由零著手處理賽規、賽事企劃。我聽講其他大學課室設備係同專業場地無分別，有選手房同副控室。
對比香港就比較偏向技能上嘅教學，實戰經驗就少啲。如果話有咩值得學習嘅話，我個人覺得唔好怕，有咩想做嘅可以諗出嚟先。尤其香港依家越嚟越多電競課程，我覺得兩者個差距唔係好大，畢竟大家都係亞洲地區，而且台灣電競收入都唔係好高。
與其諗我哋要學習台灣電競文化，不如諗下有咩辦法可以令香港電競更加突圍。
對想從事直播製作工作嘅人，你有咩建議？
我覺得電競Production Team係好多元嘅，其中一個重要嘅角色係音效控制，如果你中學時期有做開早會廣播，對你從事Production Team都會有啲幫助，因為都涉及到整音效同混音之類嘅嘢。
如果對系統方面有興趣嘅話，可以上網搵下嘅中文或者英文教學片免費自學Open Broadcaster Software（OBS）。但如果你想更深入學習，例如業界常用嘅vMix，咁你都可以去佢YouTube官方頻道學，不過主要嘅影片都係以英文為主。
2013，14年嘅時候好興整《英雄聯盟》嘅連鏡，果陣我會上網睇教學影片，不過而家好多教學影片已經過時，有啲程式都停止更新。正正因為呢個唔穩定嘅因素，我就轉做總導播。總導播自身成個團隊嘅工作，只要有相應嘅邏輯同經驗，基本上可以應付好多種活動。
你近期有冇咩工作上嘅目標或者係夢想？
最近我一直設計自己嘅CV，keep住累積多啲工作經驗。近排我有投稿去某間電競公司嘅製播崗位，但目前仲未收到回應，希望之後入到。我最大理想應該係繼續喺台灣電競公司發展，從事相關比賽嘅production，無論細崗位又好大崗位又好，只要我對電競有興趣，我唔介意做production team嘅任何職位。
如果冇機會喺呢個領域發展，我可能會返香港做其他相關工作，唔係話一定要做電競賽事嘅，我都唔介意做其他運動嘅production。雖然我對非電競類興趣可能冇咁大，但相關嘅技能都可以應用喺啱同範疇。
對想加入電競圈嘅人你有咩想講？
呢一個行業無論係台灣定香港，其實都係靠愛發電㗎！！
我可能講得好負面，但唔好覺得香港同台灣差好遠。我覺得香港仲有機會可以返去17、18年最旺盛嘅時候。
如果將來想加入嘅呢一行嘅話，我相信好多崗位都可以發光發熱！就算唔係電競圈入面發展，相應嘅技能都可以應用喺其他產業度，幫助自己成長！！
同埋再廣告再好嘅前輩/老師，都比唔上自己對某樣嘢嘅興趣去推動你向前！！
